مابين أنسى أو أتناسى ..
ريدك جواي حِـلة شوق بـ بيوتا و ناسا..
اهرب كيف انا من عينيك يالراشح جوه الروح إحساسا ؟..
منك بنبع وفيك بصب
من كتب القلم الأعلى الريدة
وخت الشوق جوانا أساسا..
بريدك غصباً عني ولا بي إيدي ولا في حكاية..
ومما شفتك ريدك بكبر بدأ بي كلمة ويكبر ويكبر ومافي نهاية..
وماتستغربي لو ناديتك بي إسمي ..
إنتي العِرِق الدافق في شريان الدنيا دمايا..
ويامريودة ونقطة مطرة
ضلت من الغيمة دروبها وجاتني
تروي مسامي وتسقي هوايا ..
ياقِبلة شوقي وروح الروح يا آآآخر غاية ..
أنا يوماتي بردد إسمك بعد (الحمدو) مكان الآية ..
لما وحاتك من أشواقي حِفِظ القول (خيط المصلاية) ..
ياآمالي وأسمى منايا..
أنا حضرت القهوة عشانك من أمبارح
وحارق ليك الغنوة بخور
و...أظنك جاية